Hazaron Khwahishen aisi ki har Khwahish pe dam nikle
bahot nikle mere arman lekin phir bhi kam nikle

Dare kyun mera qatil kya rahega usaki gardan par
wo Khoon jo chashm-e-tar se umr bhar yum dam-ba-dam nikle

Nikalna Khuld se adam ka sunte aye hain lekin
bahut be-abaru hokar tere kooche se ham nikle

Bharam khul jaye zaalim tere qaamat ki daraazi ka
agar is turra-e-purpech-o-Kham ka pech-o-Kham nikle]

Magar likhawaye koi usko khat to hamse likhawaye
hui subah aur ghar se kaan par rakkhar qalam nikle

Hui is daur mein mansoob mujhse bada-ashaami
phir aya wo zamana jo jahan se jaam-e-jam nikle

Hui jinse tavaqqo Khastagi ki daad paane ki
wo hamse bhi ziyada Khasta-e-tegh-e-sitam nikle

Mohabbat mein nahin hai farq jeene aur marne ka
usi ko dekh kar jeete hain jis kafir pe dam nikle

Zara kar zor seene par ki teer-e-pursitam nikle
jo wo nikle to dil nikle jo dil nikle to dam nikle

Khuda ke vaaste parda na kaabe se utha zaalim
Kahin aisa na ho yan bhi wahi kafir sanam nikle

Kahan maikhaane ka darawaza 'Ghalib' aur kahan waiz
par itana jaante hain kal wo jaata tha ke ham nikle
Mirza Ghalib

[chashm=eye; tar=wet; dam_ba_dam=continously]
[Khuld=Paradise; be-abaru=disgrace; koocha=street]
[qaamat=stature; daraazii=length/delay; turra=ornamental tassel worn in the turban]
[pech-o-Kham=curls in the hair)
[mansoob=association, bada_aashaamee=havign to do with drinks]
[tavaqqo=expectation; Khastagi=injury, daad=justice]
[Khasta=broken/sick/injured, tegh=sword, sitam=cruelity ]
[waiz=preacher]